Reali i Madridit fitoi 2-0 përballë Valladolidit në transfertë, një rezultat në pamje të parë mund të tregojnë dominim të skuadrës së Ancelottit, por në të vërtetë sfida ishte e hapur deri pak minuta para fundit.
Gjatë pjesës së parë madrilenët pretenduan për penallti për prekje të topit me dorë nga një lojtar vendës, por kryesori e gjykoi të pavullnetshme, ndërsa në minutën e 17-të Karim Benzema humbi një rast të pastër, vetëm pak metra larg portës.
Nga ana tjetër, Tibaut Courtois kreu një pritje spektakolare në minutën e 36-të.
Edhe pjesa e dytë nisi e ekuilibruar, për të ardhur më pas te penalltia e fituar nga Reali në minutën e 82-të, e shndërruar në gol nga Karim Benzema. Leon i Valladolidit u ndëshkua me karton të kuq për sjellje të gabuar, çka ia bëri më të lehtë punën Realit, që mbylli përfundimisht llogaritë me golin e dytë personal të Benzemasë një minutë para fundit të kohës së rregullt.
Reali e mbyll vitin në kuotën e 38 pikëve, një më pak se Barcelona, që luan këtë të shtunë derbin me Espanyolin.