Shtëpia më e madhe e futbollit në botë, FIFA ka publikuar listën e gjerë për çmimin e futbollistit më të mirë të vitit 2022.
Listës prej 14 lojtarëve që kandidojnë për çmimin “The Best” i prin Lionel Messi.
Ai udhëhoqi Argjentinën drejt titullit të botës, duke shënuar shtatë gola në shtatë ndeshje në Botërorin e Katarit, teksa u shpall edhe më i miri i Botërorit.
Përveç Messit, nga Paris Saint-German janë edhe Kylian Mbappe, Neymari dhe Achraf Hakimi.
Premier League është e përfaqësuar me Erling Haalandin, Kevin De Bruynen dhe Mohamed Salahun.
Real Madridi i ka tre lojtarë në konkurrencë, pasi fitoi vjet Ligën e Kampionëve. Pos Karim Benzemas, që fitoi Topin e Artë vjet, në listë për më të mirin e FIFA-s janë Vinicius Jr dhe Luka Modriq.
Po ashtu nuk mungojnë as Robert Lewandowski i Barcelonës dhe Sadio Mane i Bayernit.
Ka edhe disa emra befasues në listën e ngushtë. Ai i Julian Alvarezit, apo i anglezit Jude Bellingham. Cristiano Ronaldo ka mbetur jashtë listës së kandidatëve pas një viti dëshpërues.
Po ashtu, janë pesë të nominuar edhe sa i përket trajnerit më të mirë të vitit.
Carlo Ancelotti, Didier Deschamps, Pep Guardiola, Walid Regragui si dhe Lionel Scaloni janë në këtë listë.
Të nominuarit për çmimin e portierit më të mirë të vitit janë Alisson Becker Ederson, Yassine Bounou, Thibaut Courtois e Emiliano Martinez.
Votimi do të jetë i hapur deri më 3 shkurt, ndërsa fituesi të shpallet në ceremoninë e FIFA-s.