Ferizaj ka prezantuar dy futbollistët e Dritës, Albin Krasniqin dhe Drilon Islamin si dy përforcimet më të fundit në merkaton dimërore.
Siç njofton klubi, dyshja Krasniqi dhe Islami kanë nënshkruar për 18 muaj me Ferizajn.
“Goditje e dyfishtë nga Drita. FC Ferizaj ka kënaqësi të ju informoj se ka arritur marrëveshje për dy mesfushorët e talentuar, Albin Krasniqi dhe Drilon Islami. Dyshja që deri dje ishin pjesë e skuadrës së njohur kosovare, FC Drita, kanë nënshkruar marrëveshje për 18 muaj që të mbrojnë ngjyrat e klubit”, thuhet në njoftimin e klubit.
Albin Krasniqi i cili edhe në të kaluarën ka qenë pjesë e klubit ferizajas, luan si mesfushor i avancuar.
Drilon Islami luan në pozitën e mesfushorit defanziv, ku është paraqitur edhe në ndeshjen ndërkombëtare, kur Drita ka luajtur kundër Feyenoordit.
Ferizaj njëherit është edhe klubi më aktiv në elitën e futbollit kosovar në afatin kalimtar të janarit.