Përfaqësuesja U19 e Kosovës në futsall ka lëshuar dy herë epërsi prej dy golave për të barazuar në fund me Gjermaninë.
Të premten mbrëma në Shkup, Kosova e Gjermania luajtën 3:3. Ndeshja i takoi raundit preliminar të kualifikimeve për Evropianin e këtij viti në futboll të sallës.
Pas pjesës së parë Kosova udhëhiqte 2:0. Më pas kishte epërsi edhe 3:1. Për Gjermaninë është barazimi i dytë me rezultatin 3:3.
Me këto shifra ishte ndarë edhe me Maqedoninë e Veriut, të enjten. Kosova me Maqedoninë e Veriut luan të shtunën.
Vetëm fituesi i grupit avancon në fazën tjetër të kualifikimeve.
Odi Mehmeti kaloi në epërsi Kosovën në minutën e nëntë. Për 2:0 shënoi Blend Krasniqi në minutën e 13-të. Me të nisur pjesa e dytë, Gjermania shënoi për 2:1. Por Krasniqi shënoi gol tjetër në minutën e 22-të për 3:1. Gjermanët megjithatë nuk u ndalën dhe shënuan dy gola në minutën e 27-të për të siguruar barazimin 3:3.
Endi Jupolli ishte në përbërje të Gjermanisë.
Kosova në përbërje i kishte vetëm dy lojtarë të futsallit. Të tjerët janë lojtarë të klubeve të futbollit.