Futbollistet e Kosovës U19 kanë udhëhequr 1:0 e më pas deri në minutën e 83-të kishin rezultatin që ua siguronte kalimin në Ligën A për edicionin e ardhshëm kualifikues për Evropian. Por në fund Irlanda e Veriut shënoi dy gola për të fituar 3:1 dhe për të zënë vendin e parë në grup. Me vendin e parë në grup, Irlanda e Veriut promovohet nga Liga B në Ligën A të kualifikimeve për Evropian.
Kosova U19 dhe Irlanda e Veriut u takuan të hënën pasdite në Belfast, ndërsa Kosovës i mjaftonte barazimi për ta fituar grupin e raundit të dytë. Barazimi megjithatë nuk u arrit.
Gresa Berisha kaloi në epërsi Kosovën në minutën e 28-të. Rezultatin në 1:1 e barazoi Aimee Neal në minutën e 57-të. Dallimin e bëri zëvendësuesja Keri Halliday, që shënoi në minutën e 83-të dhe në minutën e 92-të.
Irlanda e Veriut e fitoi grupin me gjashtë pikë, sa i ka edhe Kosova. Por ka vendosur dueli i ndërsjellë.
Kosova në ndeshjen e parë fitoi 4:0 ndaj Qipros. Më pas fitoi 1:0 ndaj Letonisë. Ndërkohë për ndeshjen vendimtare, futbollistet e Kosovës mbetën pa forcë në momentet e fundit dhe lëshuan rastin e madh.
Në raundin e parë kualifikues, Kosova kishte mbetur prapa Bullgarisë, ndërsa kishte lënë pas Gjibraltarin. Tani ka lënë prapa Letoninë e Qipron, por kjo nuk mjafton për të avancuar.