Fituesi i Ligës së Kampionëve me Manchester Cityn, Bernardo Silva, pritet të transferohet në Arabinë Saudite.
Kështu ka raportuar të enjten mediumi spanjoll “Marca”. Silva ka kontratë me Manchester Cityn deri në vitin 2025, por futbollisti ofensiv i “qytetarëve” është i hapur për ndryshim.
Paris Saint-Germaini dhe Barcelona kishin shprehur interesim për shërbimet e tij, ndërsa ishin të gatshëm të paguanin deri në 70 milionë euro. Megjithatë, 28-vjeçari mund të jetë ylli i radhës që kalon në elitën e futbollit arab. Së fundmi në Arabinë Saudite u transferua N’Golo Kante, 32-vjeçar. Silva ishte një prej lojtarëve kryesorë në sukseset e Cityt në edicionin që shkoi. Ai realizoi shtatë gola dhe asistoi në tetë të tjerë në 55 paraqitje në të gjitha garat.