Skuadra shqiptare, Shkupi, ka shkëlqyer në ndeshjen e parë të raundit të parë kualifikues të Ligës së Konferencës. Të enjten mbrëma shkupjanët fituan shumë thellë, 5:0, ndaj skuadrës nga Lituania, Hegelmann. Madje fitoren Shkupi e arriti në udhëtim, përkatësisht në Kaunas të Lituanisë.
Është kjo fitorja më e thellë e Shkupit në skenën evropiane.
Te Shkupi shkëlqeu sulmuesi i krahut, Renaldo Cephas. Cephas është nga Xhamajka.
23-vjeçari shënoi plot katër gola. Ai nisi serinë e golave në minutën e 11-të. Për 2:0 shënoi brazilian Queven në minutën e 23-të. Në fund të pjesës së parë Cephas shënoi golin për 3:0. Në pjesën e dytë i njëjti lojtar shënoi edhe dy herë për fitoren e thellë.
Kështu ndeshja e kthimit, që luhet në Shkup pas një jave, pritet të jetë vetëm formalitet.
Shkupi prej vitit 2018 luan rregullisht në Evropë, por nuk ka shënuar fitore të thellë si të enjten mbrëma. Ndërkohë Hegelmanni ka debutuar në Evropë ndaj Shkupit. Dhe ishte një debutim më se i hidhur.