Federata e Basketbollit e Kosovës ka dhënë deklarata të mëdha kundër dhunës së shfaqur në finale të Superkupës. Por dënime për ata që shkaktuan dhunën nuk ka. Në finale u paraqitën Trepça e Peja. Tifozët e Trepçës u larguan nga palestra gjatë ndeshjes për shkak të hedhjes së gjësendeve në parket. Gjësende, duke përfshirë karrige, pas fundit të ndeshjes në parket hodhën edhe tifozët e Pejës.
Por Trepça e Peja kanë shpëtuar pa dënime. Është gjobitur vetëm Golden Eagle Ylli si organizator i turneut të Superkupës së zhvilluar në Suharekë. Ylli është gjobitur me 1700 euro gjithsej. Me nga 300 euro janë gjobitur trajnerët Adis Beqiragiq i Trepçës dhe Rami Hadar i Pejës. Ndërkohë basketbollisti i Pejës, Justin Davis u gjobit me 50 euro.
Komisioni i Garave të FBK-së vetëm të premten e ka publikuar vendimin për ndeshjen finale të së dielës. Vendimi u publikua pasi reagimet rreth dhunës u zbehën.
Organizimi i turneut të Superkupës është vlerësuar jo i mirë. Ndër të tjera në finale kishte fare pak policë. Tifozët e Trepçës kanë qëndruar në afërsi të palestrës pasi u nxorën prej saj dhe më pas ka pasur konflikte me tifozë të Pejës.
Ndeshja ishte ndërprerë për 40 minuta e më pas ceremonia e ndarjes së medaljeve ishte vonuar shumë për shkak të zhvillimeve josportive në palestër dhe jashtë saj.