Futbollistet e Dukagjinit e kanë fituar Kupën e Kosovës. Në finale të Kupës, Dukagjini fitoi 6:5 pas ekzekutimit të penalltive.
Ndeshja finale e Kupës së Kosovës për futbolliste u zhvillua të hënën në stadiumin “Fadil Vokrri” në Prishtinë.
Koha e rregullt dhe vazhdimet dy herë nga 15 minuta përfunduan me rezultat 1:1. Por futbollistet e Dukagjinit të Klinës ishin më të sakta gjatë ekzekutimit të penalltive.
Mitrovica ishte e para që kaloi në epërsi. Në minutën e 29-të golin e epërsisë e shënoi Marigona Tahiri, ndërsa Dukagjini barazoi rezultatin në minutën e 62-të. Golin për 1:1 e shënoi Gjenifer Pjetri. Mitrovica e mbylli ndeshjen me një lojtare më pak në fushë. Një futbolliste e Mitrovicës u ndëshkua me karton të kuq.
Mitrovica është fituese e titullit. Në ndeshjen vendimtare për titull, Mitrovica e mposhti Dukagjinin 1:0. Por Dukagjini iu revanshua në garën për Kupë, duke dalë fitues.