Federata e Futbollit e Kosovës ka marrë një ftesë zyrtare për pjesëmarrje në Lojërat Mesdhetare “Mediterranean Games Taranto 2026”, që do të mbahen në muajt gusht dhe shtator në Taranto.
Ftesa është dërguar nga Federata Italiane e Futbollit dhe përfshin ekipet e reja të Kosovës, si në konkurrencën e meshkujve ashtu edhe të femrave. Kjo paraqet një mundësi të mirë për zhvillimin e talenteve të rinj dhe përfaqësimin ndërkombëtar të vendit në një ngjarje të rëndësishme sportive.
Megjithatë, sipas burimeve, Komiteti Olimpik i Kosovës nuk e ka përcjellë këtë ftesë tek FFK-ja dhe as nuk ka dorëzuar materialet përkatëse që lidhen me organizimin dhe procedurat e pjesëmarrjes. Kjo situatë ka krijuar paqartësi dhe mund të ndikojë drejtpërdrejt në përgatitjet eventuale të ekipeve.
Nëse kjo çështje nuk sqarohet në kohë, ekziston rreziku që Kosova të humbasë një rast të rëndësishëm për paraqitje në një arenë ndërkombëtare, ku zakonisht marrin pjesë shtete nga i gjithë rajoni mesdhetar.
Mbetet të shihet në ditët në vijim nëse do të ketë reagim institucional dhe koordinim ndërmjet palëve për të siguruar pjesëmarrjen e Kosovës në këtë aktivitet të rëndësishëm sportiv.