Policia e Kosovës ka konfirmuar se dy persona janë arrestuar dhe një tjetër është lënduar nga përleshja që shpërtheu pas përfundimit të ndeshjes së Superligës në futboll, Prishtina e Re – Drenica, e cila u luajt në Kampin Nacional të Federatës së Futbollit të Kosovës (FFK) në Hajvali.
Ndeshja, e cila ishte shumë e rëndësishme për mbijetesë për të dyja skuadrat, prodhoi dramë edhe në fushë. Drenica fitoi 2:3. Prishtina e Re udhëhoqi në pjesën e parë 1:0, por pas minutës së 79-të, mysafirët shpërthyen me tri gola gati në fund të ndeshjes. Prishtina e Re në minutën e 102-të shënoi për 2:3.
Në videot e postuara në rrjetet sociale pas përfundimit të ndeshjes u pa se tifozët e të dyja skuadrave u përfshin në rrahje. Aty shihet duke intervenuar edhe Policia.
Zëdhënësi i Policisë për Prishtinën, Enis Pllana, ka thënë se deri tash janë arrestuar dy persona dhe një tjetër ka pësuar lëndime.
Drenica me fitoren e sotme i ka 38 pikë në vendin e shtatë. Ka pesë pikë më shumë se Ferizaj dhe Llapi që rënditen në zonën e rënies përkatësisht barazhit, por e kanë nga një ndeshje më pak të luajtur. Janë edhe gjashtë ndeshje deri në fund.
Prishtina e Re mbetet në vendin e fundit me 28 pikë.