Juventusi është gati për një revolucion të ri në merkato.
Sipas raportimit të “Gazzetta dello Sport”, drejtuesi Damien Comolli ka vendosur të nxjerrë në shitje të katër përforcimet kryesore të verës së vitit 2025, pas një sezoni zhgënjyes që nuk i përmbushi pritshmëritë e klubit.
Mes emrave që mund të largohen është edhe ylli kosovar Edon Zhegrova. Sipas medias italiane, Juventusi po shqyrton mundësinë e huazimit të tij për t’i rritur sërish vlerën në treg, pasi një shitje e menjëhershme do të ishte e vështirë për shkak të vlerës së tij në bilancet e klubit. Të njëjtin fat mund ta kenë edhe Joao Mario dhe Lois Openda.
Ndërkohë, situata e Jonathan David është më e thjeshtë. Sulmuesi kanadez, i ardhur si lojtar i lirë nga Lille, mund të shitet për rreth 25 milionë euro, me disa klube nga Anglia dhe Franca që kanë shfaqur interesim për të.
Raporti i “Gazzetta dello Sport” e cilëson merkaton e verës së kaluar si një dështim për Juventusin, ndërsa Comolli tashmë po punon për të korrigjuar gabimet dhe për të ndërtuar një skuadër më konkurruese për sezonin e ardhshëm.
