Një adoleshent me emrin Kylian Mbappe ka zbuluar realitetin e çuditshëm që sjell fakti që e ka emrin e njëjtë me superyllin e futbollit.
Mund të duket gjë e bukur, por 18-vjeçari zbuloi se emri i njëjtë me yllin e Francës i ka ofruar gjithçka – nga trajtimi me pesë yje te kërcënimet për arrestim.
Sipas prindërve të tij, ata e kishin zgjedhur emrin shumë kohë para se sulmuesi të bëhej yll.
Duke folur për mediumin francez “Pluriel”, Kyliani zbuloi se si u ndalua nga kontrollorët e transportit derisa udhëtonte pa kartën e tij.
Telefoni i të riut kishte mbetur pa bateri që do të thotë se ai nuk mund ta dëshmonte menjëherë identitetin kur inspektorët ia kërkuan të dhënat.
Ai ua tha emrin e vërtetë, Kylian Mbappe, por tregon se ka shkuar aq keq saqë nuk ka mundur ta imagjinojë.
Në vend që të shihte anën qesharake të ngjarjes, një inspektor mendoi se i riu po përpiqej të tregohej i zgjuar.
“Nuk jam këtu për shakatë e tua”, iu kthye vrullshëm inspektori Kylianit të panjohur.
Adoleshenti më pas u mundua të shpjegonte se në të vërtetë quhej Kylian Mbappe. Situata u bë edhe më e pakëndshme kur kontrollorët kërcënuan se do ta thërrisnin policinë.
Gjatë një ndeshjeje në Seine-Saint-Denis, dy vjet më parë, Kyliani, që po ashtu është futbollist, thotë se është tallur gjatë gjithë kohës nga tifozët kundërshtarë.
“Ti nuk e ke nivelin e tij, ti nuk je i mirë sa ai”, kanë thirrur ata.
“Por unë sinqerisht vetëm doja të luaja futboll dhe të argëtohesha”, tregon Kylian Mbappe.
Ndërsa emri i solli shumë telashe, 18-vjeçari pranoi se ka pasur edhe disa avantazhe.
Kylian kishte rezervuar një tavolinë në një restorant në Paris, duke përdorur emrin e tij. Dhe menjëherë vuri re një ndalje zëri në anën tjetër të telefonit.
Vetëm pas dy-tre sekondash heshtjeje rezervimi u konfirmua. Anëtarët e stafit të restorantit ishin të pasigurt nëse po flisnin me superyllin e Real Madridit apo jo.
Kur arriti në restorant, atij iu dha një nga tavolinat më të mira.
Kyliani i panjohur po ashtu ka rrënjë kamerunase, kurse ka treguar se “u trajtua si princ”.
Ndryshimi i emrit nuk është opsion për Kylian Mbappen e panjohur në Francë. Mbappe “i vërtetë” po shkëlqen për Francën në Kupën e Botës.