Futbollistët e Gjilanit e kanë kryer seancën e fundit stërvitore para derbit të madh të Anamoravës kundër Dritës, në kuadër të javës së 16-të në Superligën e Kosovës.
Gjilani dhe Drita do të zhvillojnë derbin e madh të Anamoravës të enjten me fillim nga ora 13:00 në stadiumin me bari sintetik, pa praninë e tifozëve për shkak të sigurisë dhe kushteve jo të mira të stadiumit në fjalë.
Në faqen zyrtare të “Të Kuqve” janë publikuar disa fotografi të futbollistëve dhe stafit teknik gjatë stërvitjes së sotme.
Ajo që bie në sy është se në disa raste lojtarët dhe trajneri Zekirija Ramadani janë shfaqur të buzëqeshur, duke lënë të kuptohet se atmosfera te kampi i kuq është e mirë para derbit.
Gjilani po kalon nëpër një krizë financiare pas largimit të presidentit Florim Zuka. Raportohet se futbollistët dhe stafi kanë muaj që nuk janë paguar.
Drita e kishte fituar 4:1 derbin e fundit ndaj Gjilanit.
“Bardhekaltrit” kanë 31 pikë në pozitën e parë. Gjilani pozicionohet i katërti me 23 pikë gjithsej./Demokracia.com/