Përzgjedhësi i Përfaqësueses së Zvicrës, Murat Yakin ka folur në një konferencë për media në prag të ndeshjes vendimtare kundër Serbisë në Kupën e Botës.
Serbia dhe Zvicra do të përballen në rrethin e fundit të Grupit G dhe fitorja është jetike për dy skuadrat për kualifikim tutje.
Yakin tha se Zvicra e ka në duart e veta fatin e saj, ndërkaq shtoi se ata e duan kualifikimin.
“Ne kemi fatin tonë në duart tona. Kjo është e mira e kësaj historie. Nesër do të jetë e rëndësishme që të luajmë dominues, të luajmë lojën tonë dhe të fitojmë kualifikimin me një paraqitje të mirë, bindëse. Ne duhet të marrim nën kontroll emocionet. Duhet të punojmë shumë për të 16-të. Serbët nuk do të na lehtësojnë, por ne e kemi cilësinë. Por ne duhet të luftojmë”, tha Yakin në konferencë për media, njofton Blick.ch, transmeton Demokracia.com.
Gjatë kësaj konference, Yakin konfirmoi se lojtari shqiptar, Xherdan Shaqiri është i gatshëm.
“Shaqiri dhe Okafor janë gati të luajnë nesër. Yann Sommer dhe Nico Elvedi janë të ftohur, por të dy do të jenë në formë nesër”, shtoi ai.