Sigal Prishtina ka kaluar në finale të turneut të Superkupës së Kosovës në basketboll, pasi në gjysmëfinale triumfoi ndaj Golden Eagle Yllit. Në duelin e luajtur të premten në kryeqytet, Prishtina triumfoi me shifrat 82:75.
Në finale të këtij turneu, Prishtina do të përballet me fituesin e gjysmëfinales tjetër, ndërmjet Bashkimit dhe Trepçës që nis në orën 20:30.
Në ndeshjen ndaj Yllit, Prishtina ishte më e mirë në tri çerekët e parë të ndeshjes. Ndërsa, në të dytën e krijoi edhe epërsinë që ia mundësojë pastaj ta fitojë ndeshjen.
Ylli e fitoi vetëm periudhën e fundit, por që nuk ishte e mjaftueshme për ta mposhtur Prishtinën.
Para Yllit, Prishtina në çerekfinale e mposhti Ponte Prizrenin kurse ekipi nga Suhareka ishte më i mirë se Vëllaznimi.
Kapiteni i Prishtinës, Dardan Berisha ishte më efikasi. Berisha ndeshjen e mbylli me 28 pikë të shënuara, ndërsa pikë dyshifrore realizuan edhe Dustin Thomas (17) e Lejson Zeqiri (16).
Edhe tek Ylli, tre lojtarë realizuan pikë dyshifrore. Rashun Davis pati 31 pikë, i përcjellë nga Henrik Shirko me 12 sosh dhe Malcolm Armstead (10).