Vedat Muriqi është njëri prej lojtarëve më të rëndësishëm të Mallorcas.
Sulmuesi kosovar i ka realizuar 7 gola deri tash në 14 ndeshje dhe po mundohet ta ndihmojë ekipin ishullor të shpëtojë pa rënë nga liga.
Skuadra spanjolle s’mund të bëjë asgjë pa të dhe kjo u pa në dy ndeshjet që mungoi ai shkaku i suspendimit.
Trajneri Javier Aguierre e ka pranuar se përfaqësuesi kosovar është mjaft i rëndësishëm për ekipin, por insiston se Mallorca nuk është e varur kryekëput nga 28 vjeçari.
“Nuk ka asnjë ‘Muriqi varësi’. Është e vërtetë që Vedati po kalon nëpër një moment fantastik. E ka kuptuar se ka gabuar dhe se nuk duhet të bie në provokime pasi mungoi dy ndeshje. Ne të gjithë luftojmë për të njëjtin objektiv. Është një punë e skuadrës”, deklaroi trajneri i Mallorcas.
Muriqi i ka lënë prapa vetes sulmuesit e njohur si Karim Benzema, Vinicius Junior, Antoine Griezmann, Alvaro Morata e Edinson Cavani.
Ai ka shënuar gola në katër ndeshjet e fundit rresht, pa i përfshirë ato në të cilat mungoi shkaku i suspendimit.