Presidenti i FFK-së, Agim Ademi nuk e ka përjashtuar mundësinë e kandidaturës së tij edhe për një mandat të ri në krye të futbollit kosovar. Mandati i tij i tanishëm përmbyllet në vitin 2026, por ai thotë se kur të vjen koha e zgjedhjeve do të shohë se nëse do të ketë mbështetjen e njerëzve të futbollit do të kandidojë sërish.
“Në 2026 është mandati tjetër. Mua nuk më është bërë varësi posti, por më është bërë varësi futbolli. Nuk dua asgjë tjetër për krejt ato që i kam dhënë për futbollin, vetëm si satisfaksion është që të thuhet se në kohën e Agim Ademit është bërë kjo, është bërë kjo. Përderisa këta njerëz që janë në futboll më përkrahin dhe e shohin të arsyeshme dhe të nevojshme që unë të jem në futboll dhe unë e shoh veten se kam çka të jap për futbollin do të jem aty”, ka theksuar Ademi në podcast ‘Tu pa, tu ba’.
Ai ka thënë se qëllimi i tij është që futbollit t’ia bëjë të gjitha gjërat që i nevojiten dhe që i ka mangu, pra infrastrukturën e gjërat e tjera elementare.
“E ndjej si obligim që futbollit t’ia lë një ekip udhëheqëse të re, të cilët janë në futboll, që janë marrë me futbollin dhe që e duan futbollin. Asnjëherë në futboll, nën udhëheqjen time dhe uroj dhe shpresoj që edhe pas udhëheqjes sime, nuk do të vijnë njerëz me parashuta prej jashtë futbollit për interesa të tyre. Nëse anëtarësia e futbollit kanë interes dhe e shohin se po evoluon futbolli në këtë periudhë, gjithsesi se do të jem kandidat edhe për një mandat”, ka shtuar Ademi.