Nga prilli i këtij viti FFK do të fillojë me organizimin e kursit për Licencën A për trajnerët e futbollit, një hap ky sa i rëndësishëm, po aq i nevojshëm për zhvillimin e mëtejmë të futbollit në vendin tonë.
Numri një i FFK-së, Agim Ademi ka thënë se kjo është një e arritur e madhe që tregon për punën e mirë që po bëhet në këtë institucion.
“Përgëzoj sektorin e edukimit në krye me Sanije Krasniqin, u.d.Sekretarin e Përgjithshëm, Markus Weidner, i cili u angazhua shumë kohët e fundit në këtë drejtim, por edhe ligjëruesit dhe mentorët për punën e palodhshme dhe përkushtimin e treguar në vitet e kaluara në kurset e suksesshme për Licencat B dhe C.
Falënderoj mentorin tonë nga UEFA, z. Dany Ryser, i cili me punën e tij të palodhshme dhe profesionalizmin e tij të pashoq ka ndikuar në rritjen e vazhdueshme të sektorit të edukimit në FFK. Mirënjohje të veçantë i shpreh të gjithë instruktorëve të UEFA-s, që kanë qenë pjesë e procesit të edukimit të trajnerëve në Kosovë.
Jam i bindur që me strategjinë tonë të qartë dhe me punën profesionale në vazhdimësi, FFK do të arrijë të përfitojë edhe organizimin e kurseve për Licencën UEFA Pro nga Paneli Jira i UEFA-s brenda pak vitesh, po sa të përmbushet afati i nevojshëm.
Vazhdojmë me përgjegjësi e krenari, bashkë për futbollin! ⚽🇽🇰 “, ka shkruar Agim Ademi.