Presidenti i Federatës së Futbollit të Kosovës, Agim Ademi ka komentuar kalimin e Mirlind Dakut dhe Arbnor Mujës nga Kosova te Shqipëria.
I pari i shtëpisë së futbollit në Kosovë ka thënë se nuk do t’i lejonte asnjë lojtarë të largohej, përfshirë Dakun e Mujën, por që askënd nuk do ta ndalte me zor.
“Daku dhe Muja kanë qenë të grumbulluar me Kosovën. Bile Muja ka qenë edhe në ndeshjet e para. Daku u grumbullua edhe në kohën e Challandesit. Kosovën ose e do me zemër ose s’e do” – ka thënë Ademi në Klan Kosova.
“Daku nuk e di pse shkoi. Sigurisht për pjesën e konkurrencës u largua. Unë u dëshirova sukses. Nëse do kisha mundësi do t’i ndalja të gjithë, s’e kisha lëshu as Dakun e as Mujën. Por, nuk i ndali me zor” – shtoi ai.
Daku dhe Muja iu bashkuan Shqipërisë muajt e fundit, ndërsa arritën të kualifikohen në Kampionatin Evropian 2024, që mbahet në Gjermani.