Selektori i grupmoshës U19 të Kosovës në futboll, Adil Maliqi, ka theksuar pas ndeshjes se fitorja ndaj Spanjës U19 në kualifikimet për Kampionatin Evropian 2025, ka qenë shumë e merituar.
Ai shtoi se edhe në pranverë kur Kosova U19 u përball me Spanjën në “Elite Round” dhe kur humbi 2:1, ishte më e mirë.
Ndryshe nga ndeshja në pranverë, Maliqi thotë se të shtunën në “Fadil Vokrri”, lojtarët e tij shfrytëzuan çdo mundësi që e patën dhe e fituan ndeshjen me meritë.
“Dua t’i falënderoj djemtë për përkushtimin dhe qëndrueshmërinë taktike që e kanë pasur në fushë, të cilën e kemi zbatuar këto dy ditë. Pas ndeshjes me Austrinë kemi pasur shumë kritika, por ato i kemi kthyer me një rezultat pozitiv sonte. Ju kam thënë djemve që para gjashtë muajsh ishim shumë afër për t’i mposhtur, edhe atëherë ishim më të mirë, por nuk arritëm të finalizonim aksionet. Sot ia dolëm me kaq shumë meritë. Kaherë nuk kam fituar ndonjë ndeshje me kaq shumë meritë, në këtë nivel kundër fitueses së Kampionatit Evropian. Krijuam shumë raste përgjatë 90 minutave. Kjo tregon se çfarë cilësie kemi ne”, ka thënë Maliqi pas ndeshjes.