Ku do ta vazhdojë karrierën sulmuesi i Kosovës, Milot Rashica? Kjo pyetje është bërë gjatë ditëve të fundit nga shumë tifozë të futbollit.
Rashica luan për skuadrën e madhe turke, Beshiktash. Për një largim të mundshëm të
Rashicës nga Beshiktashi kanë shkruar shumë media turke ditëve të fundit.
Të martën mediume turke raportuan se Beshiktashi e ka miratuar shitjen e 29-vjeçarit. Skuadra nga Bundesliga, Borussia Monchengladbach, është shkruar të jetë destinacion i tij.
Madje u raportua se Rashica ka arritur marrëveshje personale me klubin gjerman.
Të gjitha këto i ka demantuar menaxheri i Rashicës, Altin Lala.
Ish-futbollisti i njohur i Kombëtares së Shqipërisë, Lala, për KOHËN tha se raportimet nga Turqia nuk janë të vërteta.
“Nuk janë të vërteta raportimet. Nuk ka pasur interesim për Rashicën nga Monchengladbachu”, u shpreh Lala të martën.
Sulmuesi i krahut pjesë e Beshiktashit është nga viti 2023. Ai ishte transferuar nga Norwich City për 5 milionë euro. Kontrata i përfundon në verën e vitit 2027.
49-vjeçari Lala theksoi se Beshiktashi e ka në plan Rashicën edhe për edicionin e ardhshëm.
“Miloti ka edhe dy vjet kontratë dhe klubi planifikon me Milotin. Beshiktashi nuk e ka nxjerrë në shitje. Kështu qe ai do të luajë edhe sezonin e ardhshëm aty”, ka thënë Lala.
Muajin e kaluar, në një intervistë për KOHËN, Rashica kishte deklaruar se është i lumtur te Beshiktashi dhe nuk e mendon largimin.
“Kam edhe dy vjet kontratë në Beshiktash. Për momentin jam rehat. Kështu që nuk ka diçka”, ishte shprehur një prej lojtarëve kryesorë të Kosovës.
Rashica në edicionin 2024/25 realizoi pesë gola dhe bëri 12 asistime. Ishte prej futbollistëve më të vlerësuar te gjiganti turk. Ai në të kaluarën ka luajtur në Turqi edhe për Galatasarayn.
Te Galata ishte i huazuar në edicionin 2022/23. Madje me Galatën e fitoi titullin e kampionit të Turqisë.
Rashica nga viti 2018 deri në vitin 2021 u paraqit për skuadrën e Werder Bremenit. Ka luajtur edhe për Vitessen në Holandë dhe Vushtrrinë.
Me “Dardanët” ka 57 ndeshje të zhvilluara ku ka kontribuuar me 12 gola.