Mesfushori i Marokut, Sofyan Amrabat ka vendosur që karrierën ta vazhdojë në La Liga të Spanjës. “AS” ka raportuar se Amrabat ka zgjedhur Atletico Madridin para Liverpoolit e Tottenhamit, skuadra që gjithashtu ishin të interesuara për shërbimet e tij.
26-vjeçari tashmë ka arritur marrëveshje personale me ekipin spanjoll, i cili po negocion me Fiorentinan për transferimin e tij gjatë këtij muaji. Për Amrabatin, i cili shkëlqeu në Kupën e Botës “Katari 2022” ku Maroku përfundoi i katërti, Atletico ka ofruar 50 milionë euro.
Tek Atletico, Amrabat pritet ta zëvendësojë Rodrigo De Paulin që do të largohet nga ekipi. Marokeni ka kontratë deri në vitin 2024 me opsionin e vazhdimit edhe për një vit me Fiorentinën, ekip të cilit iu bashkua në vitin 2020. Këtë sezon, ai ka regjistruar 21 paraqitje në të gjitha garat për ekipin italian.