Real Madridi pësoi një tjetër humbje dhe sërish me pasoja, ndërsa Carlo Ancelotti përballet me një tjetër situatë të vështirë.
Kylian Mbappé gaboi për herë të dytë radhazi nga penalltia me fanellën e bardhë, pikërisht mbrëmë, në humbjen 2-1 ndaj Athletic Bilbao, në ndeshjen e vlefshme për javën e 19-të të La Liga-s.
Nuk kaloi shumë kohë dhe kritikat e ankesat shpërthyen, si në rrjetet sociale, ashtu edhe nga shtypi, duke reflektuar momentin e vështirë që po kalon superylli francez.
Ancelotti doli në konferencë për shtyp pas ndeshjes dhe deklaroi: “Unë nuk kam folur ende me Mbappé. Ishte një ndeshje e ekuilibruar. Po të barazonim, mund ta kishim marrë kontrollin, por detajet e vogla na penalizuan. Nuk mund ta vlerësoj lojën e një lojtari vetëm nga një penallti. Sigurisht, Mbappé është i trishtuar, i zhgënjyer, por… këto gjëra ndodhin. Duhet të ecim përpara”.
Mbappé dhe ndryshimi i ekzekutuesit të penalltive: “Pa dyshim, ai nuk është në nivelin e tij më të mirë, por duhet t’i japim kohë për t’u përshtatur. Duhet t’i japim kohë për të bërë më mirë. Kur është Vinicius, ai i godet penalltitë mjaft mirë. Ekzekutuesit e penalltive janë tre: Mbappé, Bellingham dhe Vinicius”.