Pas shumë e shumë vitesh në kërkim, Argjentina e ka fituar Kupën e Botës “Katar 2022”, duke triumfuar në finale kundër Francës vetëm pas penalltive.
Kombëtarja nga Amerika e Jugut triumfoi 4:2 pas penalltive, pasi 120 minutat e takimit u mbyllën 3:3.
Në lojën e rregullt, baraspesha në rezultat zgjati deri në minutën e 23-të kur Lionel Messi u tregua i saktë nga penalltia. 13 minuta më vonë, Angel Di Maria konkretizoi me gol një kundërsulm të shpejtë të Argjentinës.
Kthimin e madh të Francës e bëri Mbappe që fillimisht ngushtoi shifrat në minutën e 80-të nga penalltia, ndërsa dy minuta më vonë e barazoi atë me një supergol.
Në vazhdime ishte Messi që realizoi golin e tretë për Argjentinën në minutën e 109-të, por Mbappe kompletoi het-trikun në minutën e 118-të.
Ky është trofeu i tretë i Kupës së Botës në histori për Argjentinën, ndërsa i pari për shtatë herë fituesin e Topit të Artë, Lionel Messin.