Zyrtarë të qeverisë argjentinase i kanë bërë thirrje kapitenit të skuadrës së futbollit, Lionel Messi dhe presidentit të Federatës së Futbollit të vendit, Claudio Tapia, që të kërkojnë falje për videon që u shfaq gjatë festës së futbollistëve të Argjentinës që pas fitimit të Kupës.
Ata pasi fituan Finalen e Kupës së Amerikës, gjatë festës kënduan këngë raciste për futbollistët francezë me origjinë afrikane.
Videoja e postuar nga mesfushori Enco Fernandes nuk tregon nëse Messi po merr pjesë në brohoritje, por nënsekretari për sportin Julio Garo beson se edhe ai duhet të kërkojë falje, transmeton Ballkani.info.
“Kapiteni i Kombëtares duhet të kërkojë falje për këtë rast. E njëjta gjë vlen edhe për presidentin e federatës. Mendoj se është me vend. (Incidenti) e lë vendin tonë në një pozitë të keqe pavarësisht sukseseve të mira”, tha Garo.
FIFA tha më herët se ishte duke hetuar rastin pasi Federata Franceze e Futbollit paraqiti një ankesë, Edhe klubi Chelsea tha se kishte nisur procedurat disiplinore kundër lojtarit të saj Enco Fernandez, i cili publikoi pamjet.
Fernandes kërkoi falje publike për videon, e cila u krijua gjatë festës së futbollistëve argjentinas pas finales së Copa America në të cilën ata mposhtën Kolumbinë.