Portieri i Kosovës, Arijanet Muriq, e vlerëson hap të duhur kalimin te skuadra Ipswich Towt.
Muriq të mërkurën është zyrtarizuar si lojtar i Ipswichit që garon në Premier League të Anglisë. Klubi nuk ka zbuluar shumën që ka paguar për blerjen e Muriqit nga Burnley. Por mediume të ndryshme angleze kanë raportuar se Ipswich Town ka paguar 10 milionë euro për të siguruar shërbimet e 25-vjeçarit.
Muriq ka nënshkruar kontratë katërvjeçare me skuadrën që në edicionin 2024/2025 kthehet në elitën e futbollit anglez.
“Jam i emocionuar që i jam bashkuar klubit dhe mezi pres të filloj”, ka thënë Aro për sajtin zyrtar të Ipswichit.
Ai thotë se Ipswichi është klub i duhur për t’i treguar vlerat.
“Kam parë se si luajti skuadra sezonin e kaluar dhe ndjeva se stili do të më përshtatet shumë, kështu që kjo është lëvizje perfekte për mua. Kam pasur bisedime të mira me trajnerin e parë dhe atë të portierëve, Rene Gilmart. Besoj se ky është vendi i duhur për mua. Klubi do të paraqitet në Premier League dhe mezi pres të filloj”, ka theksuar shtatlarti.
Muriq do t’i bashkohet ekipit të ri në Austri, ku është duke u përgatitur për edicionin e radhës.
Aro Muriq u lind në Zvicër, ndërsa luajti rol të madh në promovimin e Burnleyt në Premier League, në edicionin 2022/2023, përpara se të paraqitej dhjetë herë për Burleyn në elitë, në edicionin e kaluar.
Ai u vlerësua për paraqitjet e mira, ndonëse nuk arriti të mbijetonte në elitën e futbollit të Anglisë me Burnleyn. Por, Muriq bëri bujë edhe me disa gabime të rënda.
Muriq do ta ketë sërish rastin t’i tregojë vlerat në njërën prej ligave më të forta në Evropë.
Burnleyt i ishte bashkuar dy vjet më parë nga Manchester City për 3 milionë euro dhe kishte nënshkruar kontratë deri në verën e vitit 2026. Si i ri, ai iu bashkua Cityt dhe luajti për U18 e U23, përpara se të debutojë me ekipin e parë në edicionin 2018/19. Gjatë kohës sa ishte nën kontratë me Cityn, Muriq ka qenë i huazuar te NAC Breda e Willem II në Holandë, te Nottingham Foresti në Angli, Girona në Spanjë dhe Adana Demirspori në Turqi.
Ai është titullar i padiskutueshëm te Kosova dhe deri më tani ka regjistruar 38 paraqitje prejse debutoi për “Dardanët” më 20 nëntor të vitit 2018.