Arsenali ka bërë zyrtare sot firmën me futbollistin ofensivë belg, Leandro Trosard.
Futbollisti kishte shkëlqyer me fanellën e Brajton dhe kishte fituar hapësirat edhe për përfaqësuesen e vendit të tij, duke shtyrë Artetën që të kërkonte firmën me 28-vjeçarin pasi pa Chelsea t’i hiqte nga duart talentin Mikhailo Mudrik.
Palët kanë gjetur akordin me Arsenalin që ka paguar 20 milion paund te Brajton, si dhe 7 milionë paund të tjera do të jenë në formë bonusesh në arritjen e objektivave të ndryshëm. Trosard ndërkohë do të përfitojë 90 mijë paund në javë në kontratën që e lidh me klubin londinez.
Arsenali e ka prezantuar lojtarin me një video në rrjetet sociale ku shfaqeshin pjesë të Londrës ku ka qendrën klubi, apo edhe emra që kanë bërë histori në këtë skuadër si Henri, Vengër apo edhe Granit Xhaka i cili shfaqej vazhdimisht në pamje.