Ballkani e fitoi 2:1 ndeshjen e parë në udhëtim te Santa Coloma, në rrethin e parë kualifikues të Ligës së Kampionëve.
I ka gjasat shumë të mira për të avancuar tutje.
Ndeshjen kthyese e luan të martën nga ora 16:30 në stadiumin “Zahir Pajaziti” në Podujevë.
Tri herë rresht fituesi i Superligës së Kosovës ka kërkuar mbështetjen e tifozëve, ndërsa ka njoftuar se hyrja do të jetë pa pagesë.
“Për ndeshjen e parë si vendas në Evropë, që e zhvillojmë në stadiumin ‘Zahir Pajaziti’ në Podujevë, biletat i kemi lëshuar falas! Dueli kthyes ndaj Santa Colomas zhvillohet të martën, me fillim nga ora 16:30 dhe FC Ballkani ju fton të gjithëve për ta vazhduar bashkë rrugën tonë, në Ligën e Kampionëve. Na priftë e mbara”, ka shkruar Ballkani të shtunën në Facebook.
Ballkani dy herë ishte pjesëmarrës në fazën grupore të Ligës së Konferencës.