Kampioni në fuqi, Ballkani, është kthyer në pozitën e parë në Superligën e Kosovës në futboll. Ballkani të dielën fitoi 1:0 ndaj Drenicës në Skënderaj për të dalë në vendin e parë në tabelë. Ballkani tani udhëheq me 58 pikë nga 29 ndeshje. Drita bie në vendin e dytë me 57 pikë.
Ballkanit kthimin në vendin e parë ia ka mundësuar edhe barazimi i Dritës me Dukagjinin.
Ndeshja në Skënderaj është vendosur në minutën e 30-të. Një krosim jo shumë i rrezikshëm i kapitenit të Ballkanit, Edvin Kuq, u devijua në portë nga portieri i Drenicës, Altin Gjokaj.
Në fakt Gjokaj bëri përpjekje për të kapur topin, por e shtyu atë në rrjetë.
Më pas Drenica ka bërë përpjekje për të barazuar rezultatin, por pa sukses. Momentet e shkëlqimit i kishte edhe Ballkani.
Drenica mbetet e fundit me vetëm 23 pikë dhe me gjasa fare të vogla për të shmangur rënien.