Tre sulmuesit e Barcelonës shënuan gola, ndërsa skuadra katalunase thuajse siguroi gjysmëfinalen e Ligës së Kampionëve.
Barça e fitoi bindshëm, 4:0, ndeshjen e parë çerekfinale të Championsit ndaj Borussia Dortmundit. Ndeshja u zhvillua të mërkurën mbrëma.
Të martën e ardhshme është ndeshja e kthimit në Dortmund, që pritet të shërbejë vetëm për të konfirmuar vendin në gjysmëfinale të Barcelonës.
Robert Lewandowski, Raphinha dhe Lamine Yamal kanë shkëlqyer për Barcelonën në fitoren ndaj skuadrës gjermane.
Në minutën e 25-të, braziliani Raphinha shënoi me asistim të Pau Cubarsit për 1:0.
Në minutën e 48-të, Robert Lewandowski shënoi për 2:0. Asistues ishte Raphinha. 36-vjeçari Lewandowski shënoi edhe golin e tretë për Barcelonën, në minutën e 66-të. Fermin Lopez ishte asistues, ndërsa pjesë e aksionit ishte edhe Lamine Yamal.
Supertalenti Yamal e shënoi golin e katërt në minutën e 77-të. Sërish asistues ishte Raphinha.
Raphinha tani i ka 12 gola e shtatë asistime në 11 paraqitje këtë edicion në Champions. Është golashënuesi më i mirë. Lewandowski tani i ka 11 gola në 11 paraqitje. Polaku është bërë lojtari i parë që ka shënuar mbi dhjetë gola në një edicion në Champions për tri skuadra të ndryshme. Këtë e kishte arritur edhe me Borussia Dortmundin dhe Bayernin.