Skitarja zvicerane Lara Gut-Behrami e ka fituar disiplinën Super-G në Kupë të Botës, të enjten në Soldeu të Andorrës.
Bashkëshortja e Valon Behramit dhuroi paraqitje të shkëlqyer, duke e përfunduar garën për 1 minutë, 26 sekonda e 70 të qindtat.
Mposhti konkurrenten italiane Federica Brignone që ishte kampione në fuqi e kësaj disipline. Ajo ishte me 22 të qindtat vonesë.
“Ka qenë një sezon dramatike dhe sot mendoj se vetëm u mundova të skijoj sa më shpejtë që është e mundur. Është ditë emocionale, fitorja, çmimi i globit të kristaltë, pensionimi i Nicole Schmidhoferit, unë po plakem, po bëhem më emocionale dhe po qaj gjatë tërë kohës, por është ndjenjë e mirë ndonjëherë”, ka thënë 31-vjeçarja Gut-Behrami, e cila është tani prapa Katja Seizingerit dhe Lindsey Vonnit që kanë nga pesë tituj në disiplinën Super-G.
Gut-Behrami ka medalje të artë Olimpike nga viti 2022 dhe titull bote në vitin 2021.
Ajo është edhe kampione e përgjithshme e Kupës së Botës, që e fitoi në vitin 2016.
Kohën e tretë më të shpejtë e pati Raghnild Mowinckel, që hyri në finish me 55 të qindtat më vonë se vendi i parë, por e kompletoi podiumin.
Pesë herë kampionia e përgjithshme, Mikaela Shiffrin, bëri disa gabime dhe përfundoi në vendin e 14-të.
Ishte gara e parë për Shiffrinin që e vendosi rekordin për më së shumti fitore në karrierë, 87 gjithsej.
Ajo e kaloi suedezin Ingemar Stenmark për më së shumti fitore në karrierë.
Stenmark pati 86 fitore.