Përfaqësuesja e Kosovës në basketboll ka mësuar grupin dhe kundërshtarët për rundin e tretë të parakualifikimeve për “Eurobasket 2025”. Në shorin e tërhequr të martën, Kosova do të jetë pjesë e Grupit H, së bashku me Zvicrën e Danimarkën.
Kosova ishte e para në vazon e tretë, përkatësisht të fundit, së bashku me Norvegjinë, Irlandën e Shqipërinë. Zvicra ishte në vazon e parë, ndërsa Danimarka në të dytën. Përfaqësueset ishin të ndara nëpër vazo në bazë të ranglistës botërore. Dymbëdhjetë përfaqësueset janë ndarë në katër grupe me nga tri ekipe.
Ndeshjet do të luhen prej 19 korrikut deri më pesë gusht të këtij viti, ndërsa vetëm fituesit e grupeve do të avancojnë tutje. Kosova nuk ka pasur shumë sukses në rundin e parë të parakualifikimeve për “Eurobasket 2025”. Në grup me Danimarkën dhe Norvegjinë kishte mbetur e fundit.
Ndërkohë, Shqipëria do të luajë në kuadër të Grupit I dhe do të përballet me Rumaninë e Sllovakinë.