Mërgim Berisha sot mori ftesën nga Kombëtarja e Gjermanisë, në kohën kur Kosova ishte duke pritur që ai t’i bashkohej “Dardanëve”.
Gjermania do t’i luajë dy ndeshje miqësore gjatë këtij, pasi që është organizatore e Kampionatit Evropian “Euro 2024” dhe nuk merr pjesë në eliminatore.
Kombëtarja gjermane do të takohet me Perunë, më 25 mars, kurse me Belgjikën pas tri ditësh.
Përzgjedhësi Hansi Flick zbuloi sot listën me futbollistët e ftuar për këto ndeshje, në të cilën bën pjesë edhe Berisha.
Futbollisti nga Kosova ka dhënë një intervistë për faqen zyrtare të klubit ku ai aktivizohet, Augsburg, ku tha se është i lumtur që po i realizohet ëndrra për të luajtur për Gjermaninë.
“Jam shumë i lumtur për nominimin – është një ëndërr që po bëhet realitet”, tha sulmuesi i lindur në Berchtesgaden.
“Kam punuar gjatë dhe shumë për të, por unë e di gjithashtu që nuk kam arritur asgjë ende. Mezi pres sfidën për të qenë në gjendje të dëshmoj veten në ekipin kombëtar. Faleminderit të gjithëve që më besuan gjithmonë dhe që më mbështetën gjithmonë. Do të bëj gjithçka që mundem për të shfrytëzuar këtë shans”, shtoi anëtari i Augsburgut.
Me këtë rast gjasat që Berisha t’i bashkohet Kosovës shkojnë në një pikë minimale, sidomos nëse paraqitet mirë për Gjermaninë.
Viteve të fundit, Kosova ka humbur një numër të konsiderueshëm të futbollistëve cilësorë, shumë prej të cilëve po preferojnë të luajnë për shtetet tjera.
Ka pasur raste kur edhe ekipet e shpresave të Kosovës janë braktisur për të luajtur për shtete tjera
24-vjeçari ka luajtur gjithsej 13 ndeshje për Kombëtaren U21 të Gjermanisë.
Në vitin 2021, ai u bë kampion evropian për grumposhën U21. Në turneun në Slloveni dhe Hungari, Berisha u paraqit në të gjashtë ndeshjet, duke përfshirë edhe finalen ndaj Portugalisë.
