Ish-lojtari i Liverpoolit, Jamie Carragher, ka bërë shaka me pronarin e Chelseat, Todd Boehly, pasi ekipi i tij humbi nga Borussia Dortmund (1-0) në ndeshjen e parë të xhiros të fazës së eliminimit direkt të Ligës së Kampionëve.
Chelseat nuk po i ecën edhe aq, pasi që në kohët e fundit nuk ka pasur rezultatet e duhura.
“Lajmet e fundit në rrjetet sociale. Todd Boehly dëshiron të blejë të gjithë ekipin e Dortmundit”, ka thënë Carragher në studion televizive, duke shkaktuar të qeshura nga Thierry Henry dhe Micah Richards, gjithashtu ish-futbollistë.
Carragher e kishte fjalën për qindra miliona euro të shpenzuara për lojtarë të rinj nga konsorciumi i drejtuar nga amerikani Boehly, i cili bleu Chelsean nga Roman Abramovich vitin e kaluar.
Sipas Transfermarkt, Chelsea shpenzoi 611 milionë euro këtë sezon për të sjellë lojtarë të rinj dhe fitoi 67 milionë duke shitur.
Lojtari më i shtrenjtë ishte argjentinasi Enzo Fernandez nga Benfica, njëherësh lojtari i ri më i mirë i Botërorit të Katarit, i cili u soll për 120 milionë euro.