Franca siguroi finalen e Kupës së Botës pasi eliminoi Marokun në gjysmëfinale, por ka shqetësime rreth shëndetit të disa lojtarëve te kjo përfaqësuese. Një numër i madh i lojtarëve kanë pasur simptoma misterioze, të ngjashme me grip.
Sidoqoftë, situata është shqetësuese te Përfaqësuesja e Francës. Dy lojtarët që e kaluan më keq këtë situatë kanë qenë Dayot Upamecano dhe Adrien Rabiot, që nuk luajtën në gjysmëfinale. Rabioti ka qenë i izoluar në hotelin e skuadrës.
Në Katar ka shqetësime për një virus të cilin e kanë quajtur “gripi i devesë”. Madje është raportuar se edhe shumë tifozë të cilët kanë qenë të pranishëm në Kupën e Botës, me t’u kthyer në shtëpitë e tyre, kanë pasur të ftohtë.
“Gripi i devesë” është emri më i zakonshëm për sindromën respiratore në Lindjen e Mesme – që mendohet se shkaktohet nga koronavirusi.
Ky virus, siç ka shkruar mediumi spanjoll “AS”, transmetohet nga kafshët te njerëzit.
Për herë të parë ishte zbuluar në Arabinë Saudite në vitin 2012, dhe që nga ajo kohë janë konfirmuar në laborator gjithsej 2600 raste te njerëzit. Simptomat e këtij gripi përfshijnë ethe, dhimbje të fytit, koll të thatë dhe vështirësi në frymëmarrje.
“Kingsley ka pasur ethe në mëngjes. Në Doha temperaturat kanë shënuar rënie paksa dhe shumica e njerëzve përdorin kondicionerin gjatë gjithë kohës. Kemi pasur disa raste të simptomave të gripit. Mirëpo po kujdesemi që të mos e përhapim te lojtarët e tjerë. Upamecano nuk u ndie mirë menjëherë pas ndeshjes me Anglinë. Kjo ndodh si pasojë e lodhjes së madhe, pasi mundësitë janë të mëdha për të marrë virusin. Po i ndërmarrim të gjitha masat e nevojshme për ta parandaluar. E kemi ndarë atë nga pjesa tjetër e grupit, njësoj si Adrien Rabiotin”, ka thënë Deschamps të enjten.