Chelsea e Manchester City kanë barazuar 4:4 në ndeshjen e jashtëzakonshme të së dielës mbrëma. Derbi i madh anglez ishte shumë dramatik, ndërsa nuk dha fitues.
Erling Haaland shënoi për 1:0 në të mirë të Cityt në minutën e 25-të. Për 1:1 shënoi Thiago Silva në minutën e 29-të.
Chelsea më pas kaloi në epërsi 2:1 me golin e Raheem Sterlingut në minutën e 37-të. Për 2:2 shënoi Manuel Akanji në minutën e parë shtesë në pjesën e parë.
Drama vazhdoi në pjesën e dytë. Erling Haaland shënoi për 3:2 menjëherë në minutën e 47-të. Për 3:3 shënoi Nicolas Jackson i Chelseat në minutën e 67-të.
City kaloi në epërsi 4:3 me golin e Rodrit në minutën e 86-të.
Në minutën e 89-të, Armando Broja hyri në lojë. Sulmuesi shqiptar nxori penallti për Chelsean në minutat shtesë. Në minutën e 95-të nga pika e bardhë i saktë ishte Cole Palmer që i siguroi një pikë shumë të vlefshme Chelseat.
Superderbi i ka takuar xhiros së 12-të të Premier Leagues. City është lider me 28 pikë, ndërsa Chelsea ka 16 pikë në pozitën e dhjetë.