Dy herë kampioni i Evropës për klube, Chelsea, është gati t’ia ndërpresë kontratën Pierre-Emerick Aubameyang, pasi sulmuesi hyri në dhomën e zhveshjes së Barcelonës pas fitores në El Clasico ndaj Real Madridit.
Reprezentuesi i Gabonit ishte i pranishëm në fitoren dramatike të katalanasve ndaj Real Madridit në El Clasico të së dielës, ku raportohet se vizitoi dhomën e zhveshjes më pas. Gazeta spanjolle SPORT shkruan se gjatë kësaj vizite, pavarësisht se nuk ka qenë në kontakt direkt me presidentin Joan Laporta, Aubameyang shprehu hapur dëshirën e tij për t’u rikthyer në klubin që e quajti si shtëpi për gjysmë sezoni. Mendohet se ai madje do të ishte i gatshëm të merrte një ulje page për të lehtësuar lëvizjen.
Natyrisht, kjo vizitë nuk ka shkuar shumë mirë në Londrën perëndimore. Chelsea thuhet se është e hapur për të ndërprerë kontratën e sulmuesit një vit më herët dhe do ta lë atë të lidhet sërish me klubin katalunas në verë. Rikthimi në Angli ka qenë për t’u harruar për Aubameyang, i cili ishte kërkesë specifike e Thomas Tuchel, por gjermani u shkarkua vetëm disa ditë më vonë.
Nën urdhrat e trajnerit të ri Graham Potter, 33-vjeçari ka bërë vetëm 18 paraqitje në të gjitha garat.
Barcelona dhe Xavi, nga ana e tyre, thuhet se do ta mirëprisnin lëvizjen, me Aubameyang që të bënte një përshtypje të mirë në Kataluni si në qëndrimin e tij jashtë fushës ashtu edhe në kontributin e tij në të, pasi kishte shënuar 13 gola në vetëm 23 ndeshje.