Tifozët e futbollit në shtetin jugor indian të Keralas janë dalluar gjithmonë për dashurinë e tyre për futbollin në një vend të çmendur pas kriketit. As dita e diel nuk ishte ndryshe, shteti u përgatit për të parë finalen mes Argjentinës dhe Francës.
Ekrane të improvizuara u vendosën në të gjithë shtetin, ndërsa flamujt argjentinas dhe francezë valëviteshin në rrugë derisa mijëra tifozë u mblodhën për ta parë ndeshjen. Por një çift ra në sy në përkushtimin e tyre për lojën e bukur.
Data e dasmës së Sachin R dhe R Athira përkoi me finalen, të dielën. Ndërsa ata ranë dakord për shumicën e gjërave në lidhje me dasmën e tyre, ata nuk donin të bënin kompromis se cilin ekip mbështetën në finale. Sachin është një tifoz i flaktë i yllit argjentinas, Lionel Messi, ndërsa Athira është një mbështetëse e pasionuar e ekipit francez të futbollit.
Disa orë përpara se të dyja skuadrat të takoheshin në stadiumin “Lusail” të Katarit në një nga ndeshjet më spektakolare në historinë e Kupës së Botës, ata u martuan me njëri-tjetrin në një ceremoni të mbajtur në qytetin Kochi. Mbi bizhuteritë e tyre dhe veshjet tradicionale të dasmës, çifti kishte veshur fanellat me numrin 10 – Athira veshi atë të sulmuesit francez, Kylian Mbappe, ndërsa Sachin veshi ngjyrat e Argjentinës dhe numrin e Messit.
Gazeta “Malayala Manorama” raporton se pas ceremonisë së tyre të dasmës, çifti “vrapoi” për t’u kthyer në shtëpinë e Sachin në Thiruvananthapuram 206 kilometra larg në kohë për të parë atë që doli të ishte një finale e bujshme. Argjentina fitoi finalen me penallti 4:2, duke i dhënë 35-vjeçarit Messit një shans për të ngritur përfundimisht trofeun e Kupës së Botës. Kerala, ku Messi ka një ndjekës të shumtë, ka festuar fitoren që nga mbrëmja e së dielës, ndërsa tifozët valëvitnin flamujt e Argjentinës dhe lëshuan fishekzjarr në të gjithë shtetin.
Në Thrissur, një pronar hoteli mbajti premtimin e tij për të shërbyer pije falas nëse Argjentina fitonte. Përkushtimi i shtetit për futbollin ra në sy të FIFA-s muajin e kaluar kur bëri postim në “Twitter” për tifozët që vendosnin statuja gjigante prej kartoni të yjeve të futbollit në shtet. Ylli brazilian Neymar, gjithashtu, vuri re statujat dhe falënderoi fansat e tij në këtë shtet.