Klubi i Rubin Kazanit, ku bënë pjesë edhe sulmuesi shqiptar, Mirlind Daku, ka reaguar pas videos virale ku futbollisti i tyre ofendoi maqedonët dhe serbët pas përfundimit të ndeshjes mes Kroacisë e Shqipërisë.
Pas reagimit zyrtar nga Federata e Futbollit e Maqedonisë së Veriut dhe ajo e Serbisë, lidhur me veprimet e Dakut ka reaguar edhe klubi i tij.
Sipas komunikatës së klubit rus, vendimin për ndëshkimin e futbollistit do ta marrë UEFA, ndërkaq klubi është distancuar nga veprimet e futbollistit.
“Klubi ynë nuk dëshiron të mbështesë asnjë veprim dhe fjalë ofenduese të individëve. Lojtari ynë ishte pjesë e kombëtares shqiptare, ndaj na vjen sinqerisht keq për situatën e padëshiruar. Sa i përket sanksioneve të mundshme ndaj lojtarit, UEFA është përgjegjëse për këtë çështje, thuhet në komunikatën e Rubin Kazanit.
Daku u bashkua me tifozët pas përfundimit të takimit mes Kroacisë e Shqipërisë që u mbyll me barazim, duke udhëhequr korin e tifozëve me ofendime drejt popullit maqedonas dhe atij serbë.