Kombëtarja e Kosovës e ka mbajtur sot seancën stërvitore në Kampin Nacional në Hajvali në kuadër të përgatitjeve për ndeshjen kundër Zvicrës për kualifikimet “Euro 2024”.
Sipas Federatës së Futbollit të Kosovës, përkundër motit me rrebesh shiu dhe erëra të forta, lojtarët u shfaqën maksimalisht të përkushtuar në stërvitje dhe me dëshirë për të përmirësuar edhe me shumë formën e tyre fizike.
“Ndërkohë, krahas punës në fushën e gjelbër, përzgjedhësi Primozh Gliha dhe stafi i tij po vazhdojnë punën edhe në aspektin teorik. Ata po kryejnë videoanaliza të stërvitjeve të kaluara dhe lojës së fundit, si dhe po e analizojnë me kujdes kundërshtarin, duke përgatitur strategjitë e duhura për këtë ndeshje”, thuhet në njoftim të FFK-së, transmeton Klankosova.tv.
Tutje, bëhet e ditur se para nisjes për në Zvicër, “Dardanët” do të mbajnë edhe një stërvitje të enjten, ndërsa të premten në mëngjes do të udhëtojnë për në Bazel.