Anthony Taylor, arbitri “famëkeq” britanik, është dërguar në shtëpi nga UEFA, pas polemikave të lindura në ndeshjes Spanjë-Gjermani, e përfunduar në rezultatin 2 me 1 për iberikët, pas kohës shtesë.
Megjithatë, një rast i një penalltie të pa dhënë nga Taylor, ku mbrojtësi spanjoll Marc Cucurrella prek topin me dorë në zonë pas një gjuajtje të gjermanit Jamal Musiala, është bërë shkak sa duket për këtë vendim.
Kështu ka raportuar e përditshmja britanike Daily Mail, e cila thekson se Taylor tashmë është kthyer në shtëpi.
Në Gjermani është bërë mjaft bujë për rolin e arbitrit, me kritika dhe kërkesa që nuk do të ndryshojnë asgjë.
Moviola
Episodi shumë i diskutuar në pjesën e dytë shtesë të ndeshjes së parë të çerekfinales së Euro 2024, e luajtur mes Spanjës dhe Gjermanisë dhe e fituar 2-1 nga “Furia e Kuqe”.
Në një goditje nga Jamal Musiala, Marc Cucurella prek topin me krahun e majtë. Gjyqtari, anglezi Anthony Taylor, lë që ndeshja të vazhdojë. Pas kontrollit të heshtur të VAR-it loja vijon.
Por, vendimi i kryesorit të garës ishte i gabuar, sipas specialistëve të futbollit.
Musiala gjuan në hyrje të zonës spanjolle dhe Cucurella godet topin me krah, duke bllokuar goditjen e lojtarit të Bayern Munich-ut.
Gjesti i mbrojtësit spanjoll është i dukshëm, me lëvizjen e tij që duket se dëshiron të ndërpresë topin me krah. Në këtë kuptim, krahasimi me krahun e djathtë, të lidhur me trupin, është i padiskutueshëm.