Franca arriti të kualifikohej në gjysmëfinale të Euro 2024, pa shënuar e duke kaluar Portugalinë përmes penalltive.
Bleus nuk është se po bindin, aq sa kanë arritur në 4 më të mirat me vetëm një gol me penallti të shënuar nga Mbappe dhe 3 autogola. E pikërisht zëvendësimi i sulmuesit të ri të Real Madrid ka ekspozuar teknikun Didier Deschamps përballë kritikave.
Trajneri i Francës ka dashur të sqarojë episodin, ndërsa ka folur për skuadrën e tij pas fitores ndaj Portugalisë, të mposhtur me penallti: “Ishte një ndeshje shumë e vështirë kundër një skuadre të shkëlqyer, madje mund ta kishim fituar. Duhet të argëtohemi, jemi në një gjysmëfinale. Kur shohim lumturinë që ndajmë me tifozët, jemi të lumtur. Është motiv krenarie për lojtarët e mi, edhe pse nuk bëjmë gjithçka në mënyrë perfekte, ne nuk dorëzohemi”, tha Deschamps.
Dhe për zëvendësimin e Mbappé: “Ai e kërkoi ndërrimin pak më parë se të fillonin goditjet e penalltive – shpjegoi Deschamps -. Kylian është gjithmonë i sinqertë me mua dhe me grupin. Që nga momenti që nuk ka më aftësinë për të përshpejtuar, mes problemit në shpinë e thyerjes së hundës, nuk është në maksimumin e tij. Ai është vërtet shumë i lodhur”, përfundoi tekniku i Francës.