Komisioni Disiplinor dhe i Etikës i Federatës së Futbollit të Kosovës ka shqyrtuar rastet e para disiplinore të edicionit të ri në futbollin vendor, pas ndeshjeve të xhiros së parë në Albi Mall Superligë dhe Raiffeisen Ligën e Parë.
Në mbledhjen e mbajtur të enjten, ky organ i FFK-së ka shqyrtuar raportet e zyrtarëve të ndeshjeve dhe pamjet televizive, duke marrë disa vendime ndëshkuese ndaj lojtarëve e zyrtarëve për sjellje josportive.
Zyrtari i sigurisë së FC Ferizaj, Herton Hoxha, është pezulluar për dy ndeshje për shkak të përplasjes me stafin e skuadrës mysafire gjatë ndeshjes me Dritën. Po ashtu, për dy ndeshje është dënuar edhe ekonomi i FC Ballkani, Meriton Kryeziu, i cili në ndeshjen kundër Gjilanit u ndëshkua me karton të kuq pas reagimeve të tepruara ndaj gjyqtarit.
Në listën e të ndëshkuarve figurojnë edhe disa futbollistë: Donart Vitija i Malishevës, është pezulluar për dy ndeshje pas ndërhyrjes së ashpër ndaj një kundërshtari, e cila u konfirmua pas rishikimit me VAR.
Donat Kaqiu i Trepçës ’89 u ndëshkua me dy ndeshje për shkak të fyerjeve ndaj kundërshtarit në fund të ndeshjes kundër Prizrenit. Me po aq ndeshje u pezullua edhe Angjelo Radovani i Prizrenit, për sjellje josportive në të njëjtin duel.