Mesfushori i Kosovës, Donat Rrudhani i është bashkuar skuadrës së Luzernit.
Lajmin e ka bërë të ditur skuadra zvicerane të martën. Luzerni ka njoftuar se Rrudhani do të luaj si i huazuar deri në përfundim të edicionit 2024/2025. Skuadra zvicerane e ka edhe opsionin e blerjes për 25-vjeçarin.
Rrudhani së fundmi ishte pjesë e skuadrës së Lausanne-Sport si i huazuar nga Young Boysi. Me Young Boysin, Rrudhani ka kontratë deri në vitin 2026.
“Donati mund të përdoret në pozicione të ndryshme në mesfushë dhe do të na ofrojë opsione shtesë me cilësitë e tij”, ka thënë drejtori sportiv i Luzernit Remo Meyer të martën. 25-vjeçari të martën do ta kryejë seancën e parë stërvitore me Luzernin. Ai do ta mbajë numrin 11-të te skuadra zvicerane.
