Drita ka shënuar fitore të thellë përballë Suharekës të mërkurën në ndeshjen e mbetur të javës së tretë të Superligës së Kosovës në futboll.
Skuadra e drejtuar nga Zekirija Ramadani mposhti Suharekën me rezultatin 4:2, në ndeshjen që u zhvillua në fushën me bari sintetik në Gjilan.
Në fitoren e Dritës shkëlqeu Blerim Krasniqi. Ai fillimisht asistoi për Arb Manajn që shënoi golin e parë në minutën e 36-të, ndërsa shënoi për 2:0 në minutën e 49-të.
Liridon Fetahaj ngushtoi epërsinë në 2:1 me golin e shënuar në minutën e 54-t.
Por shpejt Drita shënoi edhe golin për 3:1 nëpërmjet Albert Dabiqajt. Ai realizoi në minutën e 57-të me asistim të Besnik Krasniqit.
Blerim Krasniqi shënoi edhe golin për 4:1 në minutën e 63-të.
Suhareka shënoi edhe një gol. Alden Shkreli shënoi golin e dytë për Suharekën në minutën e 86-të.
Me fitoren e arritur në shtëpi, Drita është ngritur në vendin e parë me 28 pikë, tri më shumë se kampioni, Ballkani, pas 13 xhirove të zhvilluara.
Suhareka mbetet në vendin e pestë me 18 pikë.