Drita e Gjilanit është ndalur në raundin e dytë kualifikues të Ligës së Kampionëve. Kampionia e Kosovës në futboll e humbi edhe ndeshjen e dytë me kampionin e Danimarkës, Copenhagenin.
Të martën mbrëma në stadiumin “Fadil Vokrri” në Prishtinë, Drita pësoi me rezultatin 1:0. Një javë më parë Copenhageni kishte fituar 2:0 në shtëpi dhe me rezultatin e përgjithshëm 3:0 avancon në raundin e tretë kualifikues të Championsit.
Ndërkohë Drita zhvendoset në raundin e tretë kualifikues të Ligës së Evropës. Do të përballet me skuadrën rumune, FCSB, apo me Shkëndijën e Tetovës. Edhe këto dy skuadra janë në raundin e dytë kualifikues të Championsit dhe cila eliminohet zhvendoset në Ligën e Evropës. Shkëndija e ka fituar 1:0 ndeshjen e parë në Shkup, ndërsa ndeshja e kthimit është të mërkurën prej orës 19:30 në Bukuresht të Rumanisë.
Drita ka shpresuar që ta përmbysë rezultatin e ndeshjes së parë, por nuk ishte as afër këtij misioni. Danezët, me shumë përvojë në skenën evropiane, kontrolluan ndeshjen nga fillimi. Në minutën e 15-të dërguan topin në rrjetë, por goli nuk u pranua për pozitë jashtë loje.
Gjërat u bënë shumë më të vështira për gjilanasit në minutën e 27-të kur sulmuesi i krahut Liridon Balaj u përjashtua direkt me të kuq. Ai la fushën për shkak të një ndërhyrje të ashpër, përkatësisht për shkelje të këmbës së kundërshtarit.
Goditja tjetër për Dritën erdhi në minutën e 42-të. Sulmuesi kryesor i Copenhagenit, Andreas Cornelius, shënoi nga zona për 1:0.
Drita në pjesën e parë rrezikoi vetëm fare në fund, kur Egzon Bejtullai bëri goditje të fortë, por të pasaktë.
Pjesa e dytë e ndeshjes ishte e qetë. Danezët nuk patën telashe për ta kontrolluar lojën dhe për ta mbajtur epërsinë.
Rastin më të mirë e lëshoi zëvendësuesi Veton Tusha. Pas një gabimi në mbrojtjen daneze, Tusha doli përballë portierit të Copenhagenit, por nuk e mposhti atë. Nga topi i kthyer nuk përfitoi Blerim Krasniqi.
Më shumë raste kishin mysafirët, por që nuk shënuan më edhe për meritë të portierit Faton Maloku.
Drita është bërë skuadra e parë kosovare që ka arritur në raundin e dytë kualifikues të Ligës së Kampionëve. Në raundin e parë kualifikues e eliminoi kampionin e Luksemburgut, Differdange. Por Copenhageni doli të jetë kundërshtar i pakalueshëm për skuadrën e Zekirija Ramadanit.
Ndeshjen e parë në kuadër të raundit të tretë kualifikues të Ligës së Evropës, Drita e ka menjëherë më 7 gusht.