Dukagjini ashtu siç është pritur, ka fituar në udhëtim te Drenica lehtësisht në kuadër të xhiros së 34-t të Superligës së Kosovës në futboll.
Dukagjini të dielën fitoi me rezultatin 4:1 në Skenderaj te Drenica që tashmë është përshëndetur me elitën e futbollit kosovar.
Fitoren skuadra nga Klina e siguroi në pjesën e parë.
Marclei Santos e hapi serinë e golave në minutën e 16-të të ndeshjes.
Altin Merlaku e dyfishoi epërsinë në minutën e 20-të, ndërsa braziliani Santos shënoi edhe një tjetër gol pas gjysmë ore lojë.
Gentian Imeri realizoi për Drenicën në minutën e 35-të.
Ndërkohë, Granit Elezaj shënoi në minutën e dytë të kohës shtesë për skuadrën që drejtohet nga trajneri Armend Dallku.
Me këtë fitore, Dukagjini ngjitet në pozitën e katërt me 47 pikë, dy më shumë se Prishtina.
Drenica mbetet me 23 pikë.