West Ham rikthehet të festojë në “fortesën” e vet. Ekipi i David Moyes mposhti 2-0 Bournemouth, rival të cilin e parakaloi në renditje, teksa siguroi suksesin e tretë radhazi në “London Stadium”, duke marrë tri pikë të rëndësishme për vazhdimësinë në Premier League.
Ndeshja ishte tepër e luftuar, rastet nuk munguan në të dy krahët, por gjithçka u vendos nga një gol i Kurt Zouma në minutën e fundit të pjesës së parë. Mbrojtësi francez përfitoi nga një rrëmujë në zonë dhe dërgoi me kokë topin në rrjetë.
Lojtarët e ekipit mik pretenduan për një prekje të topit me dorë nga kundërshtarët, por teknologjia VAR e cilësoi të rregullt golin e vendasve. Ëest Ham gjeti edhe golin e qetësisë në minutat shtesë.
Sërish VAR-i ndërhyri për një penallti në favor të skuadrës londineze. Ekzekutimin e mori përsipër Mohamed Said Benrahma. 27-vjeçari algjerian u tregua i saktë nga pika e bardhë dhe tifozët e veçantë të “Çekanëve” nisën festën në stadium.
