Drita e Gjilanit e nisi edicionin 2022/23 duke renditur fitoret një pas një. Madje, ekipi i drejtuar nga trajneri Ardian Nuhiu ishte skuadra e vetme e pamposhtur në 11 javët e para kampionale duke kryesuar në tabelën e klasifikimit në Superligën e Kosovës në futboll.
Me humbjen 1:2 nga Prishtinë në Gjilan, Drita disi nisi me formë jo stabile. “Bardhekaltrit” në takimin e radhës pas Prishtinës, triumfuan 1:0 ndaj skuadrës së fundit në tabelë, Ferizajt, me golin e Besnik Krasniqit në minutën e dytë shtesë nga pika e bardhë e penalltisë, shkruan Demokracia.com.
Se Drita kishte nisur një formë të luhatshme si në lojë, ashtu edhe në rezultate në takimet e fundit u pa në Podujevë kur pëso humbje të thellë 4:1 nga Llapi në stadiumin “Zahir Pajaziti”.
Tre herë kampionët e Kosovës dy përballjet e radhës i ka mjaft të vështira në “letër”.
Nënkampionia e Superligës këtë të diele mirëpret Ballkanin, kampionin në fuqi. Kjo sfidë është shumë e rëndësishme për ekipin e Ardian Nuhiut për vazhdimësinë e kampionit kundër një prej rivalëve kryesor për titull.
Pas Ballkanit, Dritën e pret derbi më i madh i Kosovës kundër Gjilanit. Derbi i Anamoravës gjithmonë di të jetë i paparashikueshëm, pavarësisht formës së njërës apo tjetrës skuadër.
Andaj, në dy ballafaqimet e radhës, Drita ose do ta nis një krizë të rezultateve, ose në rast të rezultateve pozitive do të tregojë se ka kaluar “turbulenca” momentale.
Drita ka 30 pikë në pozitën e parë, katër më shumë se Ballkani që ka tri ndeshje më pak të zhvilluara.